Пенов смета дека барањето на партијата Алтернатива за „поврзување на албанските општини“ претставува обид за ловење политички поени
Министерот за локална самоуправа Ристо Пенов смета дека барањето на партијата Алтернатива за „поврзување на албанските општини“ претставува обид за ловење политички поени и апелираше да се внимава со таквите изјави.
– Изградивме концепт на локална самоуправа кој ги задоволува потребите на сите граѓани и на сите националности. Јас го разбирам моментот дека сега некој сака да лови политички поени, меѓутоа треба да се внимава со таквите изјави. Таквите барања можат да влијаат на меѓучовечките односи, кои за среќа се многу постабилни денес и претпоставувам дека граѓаните нема да се поведуваат по такви барања за декомпонирање на државата, рече Пенов.
Тој исто така информираше дека самиот учествувал во креирањето на сегашната локална самоуправа, територијална поделба и децентрализација во земјата.
– Тогаш на преговорите со претставници од ДУИ, меѓу кои беа и претставници од групата која сега бара некаква измена, со поддршка на САД и ЕУ и со меѓусебна согласност изградивме концепт на локална самоуправа кој ги задоволува потребите на сите граѓани, на сите националности, додаде Пенов.
