Пелистер потклекна: Феникс на македонски погон до историско куп-финале (ФОТО)

Ова е историски момент за овој клуб со куса традиција, остварување за почит со оглед што е остварено со само седум кошаркари во ротација од кои шестмина и тоа најдобрите беа Македонци. Скопскиот тим е 16-ти во изминативе три децении од ова натпреварување кој се борел за трофејот, со желба да го повтори ланскиот успех на ТФТ, кој дебито го круниса со голема победа. За тоа и на Феникс ќе му биде потребна победа над МЗТ Скопје, што и нема да биде лесна задача со оглед на тоа што аеродромци го прикажаа денеска токму против популарната Тафта.

Избраниците на тренерот Денис Дервишевиќ апсолутно го заслужија триумфот, особено поради блескавиот старт и водството со плус 16 (37-21) во вториот период. Битолчани до крајот на првото полувреме се вратија во игра, во второто и во неколку наврати поведоа, но на крајот пресуди поголемата желба на кошаркарите на Феникс.

Бојан Трајковски со 18 поени и 13 скока, Амар Хот со 18 поени и 10 поени и Андреј Митревски со 16 поени и 10 асистенции беа трите ѕвезди на Феникс кои го одбележаа ова полуфинале и кои му донесоа на својот тим историско финале. Сеад Хаџифејзовиќ со 25 поени беше најпрецизен кај Пелистер.

Утрешното големо финале е закажано за во 19.30 часот.