Пелистер покажа заби, лошото прво полувреме го чинеше пораз од Кјелце! (ФОТО)
Слично како и на дуелите против Кил и ПСЖ, битолчани имаа можност да направат изненадување и да дојдат барем до бод, но не издржаа во последните минути и ја запишаа шестата „нула“ во елитното натпреварување. Евентуалното реми или победа ќе беше награда за добрата игра и вербата во себе по катастрофалниот старт на мечот.
Пелистер ужасно го отвори натпреварот, во 17. минута беше 2-9, а во 21. и 3-11 и се чинеше дека нашиот претставник ќе доживее дебакл. До крајот на полувремето, битолчани, сепак, намалија на 8-14, а во првите 14 минута од вториот дел направија 7-2 и се доближија на само еден гол негатива (15-16). Кјелце уште еднаш се одлепи на +3 (19-16), но потоа до последната минута Пелистер ја имаше својата шанса за изненадување. За жал, тоа изостана и македонскиот првак остана без победа во Лигата на шампионите.
Богдан Радивојевиќ со шест гола беше најефикасен кај Пелистер, Пешевски додаде четири, а Борзаж три. Урбан Лесјак оствари девет одбрани, а Гедбан фати две топки. Кај Кјелце, Михал Олејничак постигна пет гола.
Во следното коло, последно од првиот круг во групната фаза, Пелистер гостува на Сегед кој е на претпоследната позиција на табелата со три бода.
