Пелистер добива ново раководство: Убедени сме дека клубот е на вистински пат!
Стојковски и Мицевски решија да се повлечат од Пелистер, кој преку соопштение најави дека ќе добие ново раководство, како и дека клубот се движи во вистински правец.
„Со одигрувањето на последното 33. коло заврши фудбалскиот шампионат на Македонија во Првата лига, а со исклучок на неколку активности на младинските категории во клубот, ФК Пелистер полека ја испраќа сезоната 2024/25. На крајот од сезоната претседателот Митко Стојковски и членот на Управниот одбор, Тони Мицевски, си поднесоа оставки на своите функции. Во периодот под нивно водство клубот одработи голем дел од предвиденото, кое јавно беше образложено при нивното доаѓаење во јануари 2023 година.
ФК Пелистер експресно се врати во Првата лига и во првата сезона во елитната категорија играше важна улога. Соодветно на буџетот, можностите и плановите, секако земајќи го предвид и фактот дека играше како нов прволигаш, клубот дојде до шестото место во Првата лига, освои 39 бода, што е резултат достоен за почит. Стабилизацијата на проектот и на клубот во горниот слој на македонскиот фудбал беше зацртан план и резултат кој ги задоволува во моментов нашите критериуми и стандарди. Клубот во јануари 2022 година беше затекнат со долг од 24 милиони денари, кој актуелната управа го сервисираше скоро целосно и останаа само минимални долгови и тековни трошоци за сезоната која е на истек. Исто така процесот на исплаќање на обврските кон фудбалерите и вработените во клубот редовно се исполнува.
При преземањето на клубот младинските категории во клубот беа на маргините во државните шампионати, а денес се во потесен круг за најдобар младински клуб во Македонија, со генерации кои се борат за титулите во шампионатот и Купот на Македонија. Во сезоната 2023/24 нашата кадетска екипа беше шампион на Македонија, минатата сезона три генерации играа финале на Купот, а сезонава за Куп-трофејот ќе се бори нашата пионерска екипа. Во вкупната табела на младите категории Пелистер е рамо до рамо во Брера и Вардар на врвот. Бројката на членови на нашата школа е многу повисока од претходно и горди сме на почитувањето на брендот Пелистер од страна на најмладите.
Во делот на инфраструктурата клубот и Општина Битола, во соработка со Фудбалската федерација на Македонија, дефинираа план за комплетирање на стадионот „Петар Милошевски“ и горди сме што по многу години Битола ќе биде домаќин на фудбалската репрезентација на Македонија. Со комплетирање на стадионот нема да застане нашата заложба за подобри услови за нашите фудбалери. Секако продолжува планот за изградба на терени за тренинг и спортски комплекс, но за тоа потребна е помош од повеќе фактори. Најнапред комплетирање на урбанистичката документација, а потоа и конструкција за реализирање на планот.
Убедени сме дека клубот е на вистински пат и ќе го продолжи развојот. Наскоро ќе следи реорганизација, поставување на нови раководечки луѓе и подготвување на следната сезона. Клубот најискрено им се заблагодарува на Митко Стојковски и Тони Мицевски за целосното вложување во овој период и потенцира дека за нив и за луѓе со сличен став и размислување за нашиот Пелистер вратите од клубот ќе бидат секогаш отворени“, се вели во соопштението.
