Пелистер ја одбрани Битола, Алкалоид не успеа да направи изненадување!
Јасно беше дека фаворитот од Битола нема да има лесна задача против младиот тим, предводен од Кире Лазаров, а тоа го покажа и почетокот на мечот, во кој Алкалоид тргна мотивирано, во силно темпо и поведе со 6-3 веќе по осум минути игра. Пелистер имаше проблеми во нападот, но како што течеше полувремето, полека ја средуваше играта, предовден од Марио Танкоски.
И одбраната почна да функционира, па Алкалоид наиде на проблеми некаде по 20 минута. Беше 10-8 во тој период, а домаќинот поведе серија од четири невозвратени гола. Од 21. минута до крајот на полувремето, гостите од Скопје погодија само еднаш, па на паузата Пелистер го презеде водството со 13-12.
Насоките на Ларс Валтер се познаваа полесно на теренот, па водството на Пелистер стана стабилно во вториот дел, изразено и со три разлика во добар дел од полувремето. Се играше најчесто на дистанца од 2-3 гола за зелено-белите, пред завршните пет минути, кои ја дадоа неизбежната драма. Во 54. минута, Пелистер првпат поведе со плус пет, 24-19 и делуваше дека тука некаде е крајот на надежите за Алкалоид.
Меѓутоа, играта со празна мрежа им се удри од глава на битолчани, па примија два брзи гола од противничката половина. Тоа ја потхрани мотивацијата на гостите и не застанаа тука. На минута и пол до крајот намалија на минус еден, разлика која важеше и во последните 30 секунди, со напад на Пелистер. И покрај пресингот и агресивната одбрана, Денис Васиљев се јави како јунак постигнувјаќи ги двата гола за сигурна победа на Пелистер.
Тој застана на шест гола, по пет имаа Танкоски и Каспер Кисум. Во редовите на Алкалоид, Мартин Серафимов и Божидар Илиески броеја до пет. Со втората победа, Пелистер дојде до девет бода, колку што има и Вардар на врвот на табелата, а Алкалоид остана на три, засега на четвртото место.
