Партијата на пензионери му даде поддршка на Пендаровски: Не сме имале покомпетентна личност!
Партијата на пензионери на денешната конвенција му даде поддршка на Стево Пендаровски како кандидат за претседател.
Претседателот на партијата Илија Николовски во изјава за медиумите посочи дека досега Пендаровски многу успешно ја извршувал должноста претседател на државата и врховен командант на вооружените сили.
Тој нагласи дека во поновата историја не сме имале покомпетентна личност за кандидат за претседател, а додаде и неколку причини зошто би требало да добие втор мандат.
„Пендаровски зад себе нема ниту една стратешка грешка, ниту една корупциска афера или случај на судир на интереси. Без непотизам и клиентилизам и кронизам, за што сме сведоци“, нагласи Николовски кој се осврна и на противкандидатката, Гордана Силјановска Давкова, за која, рече дека сменила неколку партии.
Според него, со тоа што таа го оспорува Преспанскиот договор, ја затвора и вратата за влез во Европа.
Се обрати и претседателот Пендаровски.
„И пет години потоа, тие не само што не се извинија, кој било од нив, во лично име, претседателот на партијата како наследник поставен, лично од претходникот негов на таа позиција, туку предлагаат и кандидат кој најавува амнестија за тие кои влегоа да убиваат и да тепаат со главна политичка цел да не дозволат мирна транзиција на власта на оние кои имаат мнозинство пратеници во тој момент“, изјави Пендаровски.
