Париз испушти +20 и поразен си замина од Каунас

Францускиот вицепрвак загуби на гостувањето кај Жалгирис со 81-83 и покрај тоа што во втората четвртина водеше со 20 поени разлика (45-25 и 47-27). Пред крајот на првото и на почетокот од второто полувреме домашниот тим направи серија од 19-0 и ја стопи негативата, а во драматичниот финиш дојде и до победа со која ги задржа шансите за место во топ-6.

Ти Џеј Шортс повторно беше најефикасен во редовите на Париз, постигна 21 поен, но со лош шут за два (6/17), а и во финишот имаше неколку грешки кои влијаеја на конечниот резултат. При водство на Жалгирис од 81-79 изнуди неспортски прекршо од противнички играч, но ги промаши двете слободни фрлања и во следниот напад шутираше од неизградена позиција при што не успеа да погоди.

Жалгирис остана неказнет, па на две секунди пред крајот постигна кош преку Франсиско и дојде до триумфот.