Париз го издржа спектакуларниот пресврт на Олимпијакос и победи десетти пат по ред

Францускиот вицешампион ја оствари десеттата победа во низа откако вечерва славеше на гостувањето кај Олимпијакос со 96-90. Натпреварот имаше неверојатна последна четвртина во која домашниот тим се крена од бездната, а сепак не успеа да дојде до победа.

На седум минути пред крајот на семафорот стоеше 60-80 и многумина уште тогаш го прежалија Олимпијакос. Во следните 3,5 минути следуваше спектакуларна серија од 22-0 на домашниот тим со која тој не само што ја стопи негативата, туку и дојде во водство од 82-80. Додека траеше серијата на Олимпијакос, гостинските кошаркари имаа дури седум загубени топки, вклучувајќи две на Шортс. Во тие моменти се чинеше дека грчкиот тим ја има психолошката предност, но проработе најсилното оржује на Париз – тројките и за кратко време гостите повторно се вратија во предност која потоа ја задржаа до крајот.

Ти Џеј Шортс беше најдобар играч во својот тим со 21 поен и 8 скока, додека Фурние го предводеше Олимпијакос со 25 поени поени од кои 14 од линијата за слободни фрлања.