Пад на трошоците за живот на почетокот на 2026 година
Трошоците за живот во јануари годинава бележат намалување од 0,7 проценти во споредба со декември 2025 година, соопшти Државен завод за статистика.
Според објавените податоци, намалувањето на месечно ниво најмногу се должи на пониските цени во групата Транспорт, каде е регистриран пад од 9,3 проценти. Намалување има и кај Информации и комуникации за 1,6 проценти, Рекреација, спорт и култура за 1,5 проценти, Облека и обувки за 1,2 проценти, како и кај Лична нега, социјална заштита и разновидни стоки и услуги за 0,5 проценти.
Од друга страна, во јануари е евидентирано зголемување на трошоците во дел од категориите. За 1 процент се зголемени цените во групите Покуќнина, опрема за домаќинствата и редовно одржување на домаќинствата, како и Домување, вода, електрична енергија, гас и други горива. Раст од 0,7 проценти има кај Ресторани и услуги за сместување, додека кај Услуги за образование и Алкохолни пијалаци, тутун и наркотици зголемувањето изнесува 0,1 процент.
Трошоците на живот во групите Осигурување и финансиски услуги, Здравствена заштита и Храна и безалкохолни пијалаци остануваат на исто ниво како и во претходниот месец.
Индексот на цените на мало во јануари 2026 година во однос на декември 2025 година изнесува 97,3.
На годишно ниво, индексот на трошоците на живот во јануари 2026 година, споредено со истиот месец лани, бележи зголемување од 3,2 проценти, додека индексот на цените на мало е повисок за 1,2 проценти.
