„Пациентот бил примен веднаш“: Тетовската болница негира дека пациент починал откако еден час чекал доктор

Од тетовската болница и Министерството за здравство негираат дека пациент починал додека чекал речиси еден саат да биде примен пред одделот за брза помош во болницата во Тетово, јавува Фокус.

Од таму велат дека пациентот бил веднаш примен од доктор кој бил со него до неуспешниот обид за реанимација.

„Според првични информации, пациентот по пристигнување пред одделот за брза помош веднаш бил упатен до интернистичкиот блок. Докторот кој го примил го придружувал до прв кат, каде што му е направено ЕКГ, увидено е дека пациентот имал срцев застој. По обидите за реанимација е констатирана смрт“, велат оттаму.

Од Министерството додаваат дека Државниот санитарен и здравствен инспекторат ќе изврши вонреден инспекциски надзор за овој случај.

Претходно семејството во изјава за медиумите порача дека 60-годишниот маж починал откако еден саат чекал да биде примен од доктор.