Пациентка тврди: Васев и дал терапија без да биде запишана во регистарот!
На денешното рочиште за случајот „Онкологија 2“ во Основниот кривичен суд Скопје, пациентка која примала хемотерапија и имунотерапија сведочеше за терапија што ѝ била дадена надвор од стандардната процедура и без да биде евидентирана во регистарот.
„Др-Нино ми рече дека имаат уште три шишенца од лекот и дека едно ќе ми го даде, но нема да се запише во регистарот. По апликацијата останав со дилема зошто не беше внесена терапијата во извештајот,“ изјави сведокот.
Пациентката истакна дека не ѝ било побарано да плати и дека сама се пријавила како сведок поради граѓанска одговорност, по што одбраната порача дека вакво нешто не се случило и побара предметот да се ограничи на наводниот финансиски криминал, а не на начинот на лекување.
Судењето за „Онкологија 2“ денеска започна одново поради промена на поротник. Обвинети се поранешниот медицински директор на Клиниката за радиотерапија и онкологија, Нино Васев, и економскиот директор Нехад Нухи.
Според обвинението, во периодот 2018–2022 тие незаконски набавувале лекови, ги прикривале преку фиктивни тендери и присвојувале дел од терапијата, со што го оштетиле државниот буџет за речиси 36 милиони евра. Двајцата ја негираат вината и тврдат дека обвинението е политички мотивирано.
Покрај „Онкологија 2“, против Васев и уште двајца лекари се води и процесот „Онкологија 1“ за несовесно лекување на пациенти.
