Оваа Звезда не е за плеј-оф, Жалгирис ја симна на 16. место
Вечерва, српскиот шампион на домашен терен загуби од Жалгирис со 91-93 и падна на 16. место, а со оглед на тоа што има три победи помалку од десеттопласираниот Макаби, може уште сега да почне да размислува за животот надвор од Евролига. Драматичниот дуел беше решен во пенал-завршница, а клучен момент беше една недосудена одлука на арбитрите на десетина секунди пред крајот.
Впечаток е дека кошаркарот на Жалгирис, Канан Еванс газеше линија на задно поле при една од последните акции на неговиот тим во ситуација кога Литванците водеа со два поена разлика. Судиите не се огласија, следуваше лична грешка врз Димша кој беше прецизен од линијата за слободни фрлања и ги уништи сите надежи на Црвена Звезда.
И без тоа, Звезда немаше многу адути за победа, не играа Теодосиќ и Лазиќ, а на ниво беа само Јаго дос Сантос и Лука Митровиќ. На периоди знаеше да блесне и Недовиќ, но недоволно за да ја понесе екипата. Дос Сантос го заврши мечот со 21 поен и 14 скока, додека Еванс го предводеше Жалгирис со 25 поени, вклучувајќи пет тројки.
Ова беше трета победа по ред за Жалгирис и со тоа ја помина Црвена Звезда на табелата, а се израмни со Олимпија Милано, Баерн и Анадолу Ефес.
РЕЗУЛТАТИ
Црвена Звезда – Жалгирис 91-93
Панатинаикос – Фенербахче 74-63
Барселона – Алба 93-77
Виртус – Монако
