ОВАА ЕКОНОМИЈА ГИ НАДМИНА СИТЕ ОЧЕКУВАЊА: Рекорден раст од 8,4 отсто
Индија ја задржа титулата како најбрзо растечка економија во светот бидејќи порасна за 8,4% во последните три месеци од 2023 година, во споредба со една година претходно
Податоците доаѓаат кога во земјата треба да се одржат општи избори оваа година.
Премиерот Нарендра Моди објави на платформата за социјалните медиуми Х дека сè укажува на „силата на индиската економија и нејзиниот потенцијал“.
Се предвидува дека Индија ќе ги надмине Јапонија и Германија како трета најголема економија во светот во следните неколку години.
Подобриот раст од очекуваниот беше предводен од силните перформанси на производителите во земјава, при што секторот во тој период забележа раст од 11,6%.
Приватната потрошувачка, која сочинува речиси две третини од бруто домашниот производ (БДП) на земјата, исто така порасна за 3,5%.
Потрошувачката моќ во Индија минатата година беше погодена од високите цени на основните производи како кромидот, што ја натера владата да воведе низа мерки за ограничување на инфлацијата на цената на храната.
Во последниве години, премиерот Моди ги зголеми владините трошоци за инфраструктура и понуди стимулации за зголемување на производството на телефони, електроника, дронови и полупроводници за да и помогне на Индија да се натпреварува и да биде конкурентна на меѓународниот пазар.
Владата кон крајот на минатата недела даде зелено светло за изградба на три фабрики за полупроводници во вредност од 1,26 трилиони рупии, или околу 15,2 милијарди долари, од компании вклучувајќи го индискиот конгломерат Тата.
Од друга страна, земјоделскиот сектор, кој сочинува околу 15% од економијата од 3,7 трилиони долари, продолжи да се бори поради слабите монсунски дождови, додека некои земјоделци протестираа барајќи минимални цени на земјоделските култури.
Меѓународниот монетарен фонд очекува индиската економија да порасне за 6,5 отсто во 2024 година, наспроти 4,6 отсто на Кина.
Пекинг е под зголемен притисок да воведе стимулативни мерки за поддршка на втората по големина економија во светот, која се соочува со голем број предизвици, вклучувајќи криза на пазарот на станови, висока невработеност кај младите и пад на цените, познати како дефлација.
