Ова се најсериозните инциденти и пожари во дискотеки
Пожар предизвикан од пиротехнички средства ги однесе животите на 59 млади лица во дискотека во Кочани. Пожарот избувна во неделата во раните утрински часови за време на концертот на популарниот бенд ДНК. Вкупно 155 лица се со различен степен на изгореници и повреди.
Ова е преглед на некои од најсериозните инциденти и пожари во дискотеки.
2 април 2024 година, Турција – 29 мртви
На 2 април 2024 година, избувна пожар за време на реновирање во дискотеката „Маскарад“, лоцирана на приземјето и подрумот на 16-катната станбена зграда во квартот Бешикташ во Истанбул. Загинаа 29 лица. Шест лица се приведени во тековната истрага за инцидентот со толку многу жртви.
1 октомври 2023 година, Шпанија – 13 мртви
На 1 октомври 2023 г. 13 лица загинаа во пожар во ноќен клуб во Мурсија, југоисточна Шпанија. Четири лица се хоспитализирани откако вдишиле чад. Пожарот започнал во дискотеката Фонда Милагрос, но пламенот се проширил на уште две дискотеки – Театар и Голден. Во 2022 година Дискотеката добила наредба од градското собрание на Мурсија да ги затвори вратите бидејќи фирмата која управувала со објектот имала дозвола само за една дискотека – „Театар“, а во истата просторија отворила и втора – „Фонда Милагрос“, во која биле пронајдени телата на загинатите во пожарот.
5 ноември 2022 година, Русија – 15 мртви
На 5 ноември 2022 г. 15 лица загинаа во пожар во ноќен клуб во градот Кострома во Русија. Пожарот избувнал во раните утрински часови откако непознато лице испукало пламен. При пожарот се урнал покривот на зградата.
2 декември 2016 година, Калифорнија – 36 мртви
На 02.12.2016 г. 36 лица загинаа во пожар што избувна за време на ноќен музички фестивал во магацин во Оукленд, Калифорнија. Зградата беше преполна со мебел, статуи, светилки и други гломазни предмети, без јасно означен влез, излез или пат за бегство од пожар.
