„Ова не е само убиство, ова е напад врз човечноста“ – завршен збор на обвинителката Крстевска за убиствата на Вања и Панче
Во емотивен и остар завршен збор, обвинителката Жаклина Крстевска денеска пред Судот порача дека убиството, особено убиството на дете, не е само чин на суровост и бруталност – туку директен напад врз човечноста и врз целото општество.
„Ова не е случај за кој може да се биде рамнодушен. Ова е злосторство кое нема оправдување. Со убиството на едно невино дете не се уништува само еден млад живот, туку и вербата во добрината, во правдата, во тоа дека постојат граници што никој не ги преминува,“ рече Крстевска.
Обвинителката побара не само правна, туку и морална осуда за сите четворица обвинети – Љупчо Палевски, Влатко Кешишев, Велибор Манев и Боре Видевски. „Тие ја прекршија не само буквата на законот, туку и суштината на човековото битие,“ изјави Крстевска.
Таа потсети дека убиството на Вања било изведено „ладнокрвно и свирепо, по монструозен план“. „Се надеваа дека телото никогаш нема да биде најдено – ја оставија закопана во дупка, покриена со предмети, како да не е човечко суштество, туку отпад.“
Крстевска нагласи и дека ниту еден од обвинетите не покажал грижа на совест ни по убиството на Панче Жежовски, пензионерот од Велес кој прв стана жртва на нивниот план. „Сите имаат свои деца. И наместо да им служат како пример, тие ги убиваа други луѓе за да им купат станови, да им прават свадби, да се веселат.“
„Се почувствувале сигурни дека нема да бидат откриени, па се охрабриле да грабнат и да убијат 14-годишно дете. Вања, која со ранец на грб одела на училиште, дете кое требало да го заврши деветто одделение и да продолжи понатаму. Таа не им згрешила ништо. Беше невина. И токму затоа ова дело е толку морбидно и болно“, заврши обвинителката.
