ОВА Е ЗАТИШЈЕ ПРЕД БУРА: Голема претпазливост на Волстрит-се очекува да растат каматните стапки
На Волстрит, берзанските индекси останаа речиси непроменети во вторникот, бидејќи инвеститорите се претпазливи пред бранот квартални деловни извештаи од компаниите, кои најверојатно нема да бидат многу светли бидејќи економскиот раст забавува.
Dow Jones загуби 0,03 отсто, на 33.976 поени, а Nasdaq индексот загуби 0,04 отсто, на 12.153 поени. S&P 500 зајакна, од друга страна, за 0,09 отсто, на 4.154 поени.
Стагнацијата на индексот, меѓу другото, се должи и на послабите од очекуваните деловни резултати на инвестициската банка Голдман Сакс и на производствениот гигант Џонсон и Џонсон.
„Ова е мирот пред бурата“
Првите резултати на компаниите од составот на индексот S&P 500 најавуваат мрачна сезона на објавување деловни извештаи со забавување на економскиот раст.
Очекувањата не се многу светли. Според најновите проценки на аналитичарите во истражувањето на Ројтерс, заработката на компаниите од индексот S&P 500 ќе биде за 4,8 отсто помала во првиот квартал отколку во истиот квартал минатата година.
– Ова е смиреноста пред невремето. Во наредните недели компаниите ќе објавуваат извештаи, а инвеститорите се обидуваат да видат дали има потенцијал за раст на пазарот или не – вели Бред Мекмилан, директор во Комонвелт финансиска мрежа.
Дополнително, инвеститорите ги следат вестите кои би можеле да укажат на тоа што ќе направат лидерите на американската централна банка на состанокот на почетокот на мај.
На пазарот на пари, се проценува дека има околу 80 отсто шанси ФЕД да ги зголеми каматните стапки за дополнителни 0,25 процентни поени, во опсег од 5 до 5,25 отсто.
Инфлациските притисоци во САД се намалуваат
Инфлациските притисоци во САД се намалуваат, но други економски показатели сугерираат дека ФЕД може да продолжи да ја затегнува монетарната политика.
Џејмс Булард, претседател на ФЕД Св. Луис, тој вчера изјави дека централната банка треба да продолжи да ги зголемува каматните стапки, со оглед на тоа што последните податоци покажуваат дека инфлацијата се уште е присутна.
Рафаел Бостиќ, претседател на филијалата на Банката на федерални резерви во Атланта, рече, сепак, дека ФЕД најверојатно уште еднаш ќе ги зголеми каматните стапки.
И на европските берзи вчера поскапеа акциите. Лондонски FTSE индекс зајакна 0,38 отсто, на 7.909 поени, додека франкфуртски DAX зајакна 0,59 отсто, на 15.882 поени, а париски CAC 0,47 отсто, на 7.533 поени.
