Јотова: Македонија се оддалечува од патот кон Европската унија

Македонија се оддалечува од патот кон Европската унија, оцени бугарската потпретседателка Илијана Јотова, реагирајќи на последните случувања во Европскиот парламент поврзани со извештајот за напредокот на земјава. Таа ги оцени како „скандалозни“ случувањата околу известувачот за Македонија, европратеникот Томас Вајц, кој беше обвинет од страна на 17 бугарски европратеници дека бил под влијание на македонската страна.

– Потребна е истрага, и ако се докаже дека постои влијание, мора да има последици. Стравувам дека довербата во известувачот е нарушена и сметам дека треба да биде сменет – изјави Јотова.

Таа го повтори ставот дека С. Македонија испраќа лоши пораки, со, како што рече, „континуирано неказнување на говорот на омраза“ и „присвојување на бугарската историја“. Овие фактори, според неа, ја оддалечуваат земјата од европската перспектива.

Инаку, Комитетот за надворешни работи на Европскиот парламент на 4 јуни го одложи гласањето за предлог-извештајот за Северна Македонија за 24 јуни, по предлог на Вајц.

Вајц изјави дека стои зад документот и истакна дека во преговорите и компромисите околу извештајот биле вклучени сите пратенички групи во ЕП, и покрај политичките притисоци.