Откриени низа пропусти во службите за Итна помош и јавните здравствени установи
Контролите што Фондот за здравствено осигурување (ФЗО) ги спроведе во последните 11 месеци откриле низа пропусти во службите за Итна помош и домашна нега низ земјата. Во неколку помали места немало ампули против болка, амбулантата во Шуто Оризари не функционирала поради недостиг на персонал, а од пациенти биле наплатувани трошоци за превоз.
ФЗО извршил 37 контроли – осум во Скопје и 29 во внатрешноста. Уредни состојби биле констатирани во 23 здравствени установи, додека неправилности се пронајдени во 14. Директорот на ФЗО, Сашо Клековски, предупреди дека и покрај тоа што податоците редовно се доставуваат до надлежните институции, реакции по контролите речиси и да нема.
Паралелно, биле проверени и 26 јавни здравствени установи, каде се утврдени неправилности како незаконско зголемување на плати во болници со долгови, исплата на додатоци за сменска работа и дежурства без правна основа и прекувремена работа над дозволените 32 часа месечно. Дел од наодите, според Клековски, содржат елементи на кривични дела.
Најчести прекршувања се: погрешна пресметка на часови за дежурства (11 ЈЗУ), комбинирање на додатоци за сменска работа и дежурства (4 ЈЗУ), прекувремена работа над нормата (2 ЈЗУ), недоставување на бараната документација (8 ЈЗУ), незаконска исплата на бонуси (2 ЈЗУ) и други неправилности (4 ЈЗУ).
Здравствените установи имаат рок од два месеца да ги коригираат пропустите, а ФЗО најавува дополнителни објави од следните контроли.
