Наташа Крстевска Цалева – нова в.д. шеф на Вишото јавно обвинителство Скопје
Советот на јавните обвинители ја назначи Наташа Крстевска Цалева за вршител на должноста Виш јавен обвинител на Вишото јавно обвинителство Скопје, со мандат до избор на нов шеф, но не подолг од шест месеци. Ова беше единствената точка на дневен ред на 33-та седница на Советот.
Одлуката следи по престанокот на функцијата на дотогашниот шеф Мустафа Хајрулахи, кој поднесе оставка на 9 декември. Тој беше претходно суспендиран поради обвинителен акт на ОЈО Штип за пет кривични дела „малтретирање во вршење на службата“ и едно за „злоупотреба на службената положба и овластување“. Хајрулахи ги оспорува обвиненијата и тврди дека станува збор за политички мотивиран случај.
Крстевска Цалева и претходно беше именувана за в.д. шефица во февруари годинава, додека траеше суспензијата на Хајрулахи.
