Откриена корупција во врска со купувањето оружје за Украина, вредно околу 40 милиони долари
Украинските власти денеска соопштија дека откриле корупциска шема за проневера на средства во вредност од околу 40 милиони долари, наменети за набавка на минофрлачки гранати за армијата на земјата, јавува Радио Слободна Европа (РСЕ).
Инспекторите од Службата за безбедност на Украина (СБУ) соопштија дека пет лица се обвинети, а едно лице е приведено при обидот да ја премине украинската граница и дека парите оделе на различни сметки во Украина и на Балканот.
СБУ соопшти дека истрагата „открила функционери на Министерството за одбрана и менаџери на добавувачот на оружје Лавов Арсенал, кои украле речиси 1,5 милијарди гривни за набавка на гранати“.
„Според наодите на истрагата, во проневерата биле вмешани поранешни и сегашни високи функционери на Министерството за одбрана и раководители на поврзани компании“, објави СБУ на социјалната мрежа Х.
Проневерата вклучува набавка на 100.000 минофрлачки гранати за војската.
По исплатата, вработените во компанијата требало да ги префрлат средствата на фирма регистрирана во странство, која потоа ќе ја достави муницијата во Украина. Но, стоката никогаш не била испорачана, туку парите биле испратени на различни сметки во Украина и на Балканот.
Средствата се конфискувани и ќе бидат вратени во буџетот за одбрана на земјата, соопштија од Украинското државно обвинителство.
За одбрана од руската инвазија, Министерството за одбрана на Украина нарача 100.000 парчиња минофрлачки гранати од украинската компанија „Лвив Арсенал“ во октомври минатата година.
За ова од украинскиот буџет беа издвоени 36,6 милиони долари, но нарачаните гранати до ден денес не се доставени, а Украина по судски пат бара тие пари да се вратат.
Истрагата доаѓа во време кога Киев се обидува да ја сузбие корупцијата во обид да го забрза своето членство во Европската унија и НАТО. Официјални лица од двата блока побараа јасни антикорупциски реформи пред да ја примат Украина во нивното членство.
