ОСУМ ПРИВЕДЕНИ ВОЗАЧИ ПОРАДИ АЛКОХОЛ Битолчанец со 1,81 промили алкохол предизвика несреќа во Битола
Осум возачи биле приведени во текот на изминатата ноќ низ повеќе градови во земјава поради управување возила под дејство на алкохол, а еден од нив во Битола предизвикал и тешка сообраќајна несреќа со повредени лица.
Најсериозниот инцидент се случил по полноќ на крстосницата меѓу улиците Филип Втори Македонски и Батаљон Стив Наумов во Битола, каде се судриле „форд ескорт“ управуван од 36-годишен битолчанец и „дачиа сандеро“ што го возел 61-годишен жител на градот. Во несреќата, сопатничка од „дачиата“ се здобила со тешки телесни повреди, додека со полесни повреди завршиле двајцата возачи и уште две сопатнички. Повредените биле пренесени во Клиничката болница во Битола.
Полициската истрага утврдила дека возачот на „фордот“ управувал со 1,81 промили алкохол во крвта, по што веднаш бил приведен.
Во одделни контроли, полицијата привела и други возачи низ државата – во Куманово бил затекнат 28-годишник со дури 2,55 промили алкохол, во Велес 50-годишен возач со 1,80 промили, во Неготино 38-годишник со 1,54 промили, а во Македонска Каменица 72-годишен возач со 2,27 промили алкохол.
Приведувања имало и во Кичево, каде скопјанец возел со 1,84 промили, во Дебар – со 1,83 промили, како и во Битола, каде 58-годишен возач бил затекнат со 1,92 промили алкохол во крвта.
Сите возачи биле исклучени од сообраќај и задржани во полициски станици. По целосно документирање на случаите, против нив ќе бидат поднесени кривични пријави за безобѕирно управување со моторно возило.
.
