Осум пациенти од КАРИЛ денес заминуваат на лекување во странство

Лекарите кои се грижат за пациентите повредени во пожарот во Кочани изразија оптимизам, но предупредија дека состојбата на некои пациенти може да се влоши поради природата на нивните повреди, посебно труењето со штетни гасови. Според нив, сите пациенти сместени на Клиниката за анестезија, реанимација и интензивно лекување (КАРИЛ) се под контрола, но некои од нив покажале знаци на влошување на состојбата, па денеска се планира нивен транспорт во странство.

„Пациентите се стабилни, но има и оние кои покажуваат знаци на влошување. Не се во тешка состојба, но сè уште треба да бидат транспортирани. Денес продолжуваме со транспортирање на осум пациенти, кои ќе бидат префрлени во болници во Словенија, Полска, Австрија, Италија и Хрватска“, изјави директорот на Клиниката за трауматологија, Игор Мерџаноски.

Заменик-министерот за здравство, Јовица Андоновски, истакна дека во моментов на македонските клиники се лекуваат 89 пациенти, а досега 76 се пренесени на лекување во странство. Планирано е продолжување на транспортот на повредените во странски клинички центри, а преговори за дополнителни транспорти се во тек со здравствените власти во земји како Виена, Полска, Шведска, Холандија, Италија, Хрватска, Норвешка и Словенија.

„Во следниот период ќе продолжи транспортирањето на дополнителни пациенти. За кратко време ќе знаеме колку пациенти ќе може да бидат префрлени во овие земји“, додаде заменик-министерот Андоновски.

Директорот на Фондот за здравствено осигурување, Сашо Клековски, нагласи дека и покрај тоа што досега се испратени 76 пациенти во странство, постојат доволно резервни капацитети за нови трансфери, но за следните пациенти може да бидат избрани понаталечни земји, бидејќи капацитетите во соседните земји се веќе исполнети.