Осудениот Кара сведочеше во Штип: Тврди дека соучесниците не знаеле што направил!
Во Основниот суд во Штип продолжи судењето за четворица турски државјани обвинети за помагање во убиството што се случи во мај 2025 година на градскиот плоштад. Главен сведок на денешното рочиште беше веќе осудениот Кадир Кара, кој претходно го призна делото и доби 17 години затвор.
Кара тврди дека останатите обвинети не знаеле за убиството во кафулето.
Според него, тие дошле во Штип на заеднички ручек, а тој не им кажал што направил дури и додека возеле кон Скопје, по што пред наплатната рампа кај Миладиновци излегол од автомобилот и почнал да трча за да побегне.
Адвокатот Шенаи Османов очекува ослободителна пресуда, тврдејќи дека денешниот исказ докажал оти немало никаков претходен план или организација за извршување на злосторството.
Настанот се случи на 8 мај минатата година, кога Кадир Кара со огнено оружје усмрти друг турски државјанин во угостителски објект на плоштадот „Слобода“.
