Осомничениот за свирепите убиства во Старо Нагоричане под строг надзор: 30 дена притвор и психијатриско вештачење!
Дваесет и петгодишниот Т.Б. од Старо Нагоричане, кој се сомничи за свирепото убиство што ја потресе јавноста, веќе е спроведен во затворот во К’шање на издржување 30-дневен притвор. Од казнено-поправната установа потврдија дека по приемот му бил извршен лекарски преглед и дека тој е во добра здравствена состојба.
Истрагата за овој комплексен случај се проширува, па во следните денови врз осомничениот ќе биде извршена детална психијатриска процена од експертски тим од Клиниката за психијатрија. Основното јавно обвинителство Куманово соопшти дека интензивно се прибираат докази и се вршат распити на сведоци за целосно расчистување на настаните, но поради сензитивноста на истрагата, засега не се откриваат повеќе детали.
Паралелно со ова, резултатите од обдукцијата на втората жртва, за која претходно беше наредена ексхумација, дефинитивно потврдија дека станува збор за насилна смрт. Директорот на Судска медицина, проф. д-р Александар Станков, изјави дека кај двете жртви – и кај повозрасната жена од село Челопек и кај помладата жена – е утврдено насилно одземање на животот. Поради сличностите во изборот на жртвите и екстремната суровост при извршувањето на делата, обвинителството испитува дали истиот сторител е одговорен за сите случаи.
Крвавиот поход на Т.Б. излезе на виделина по неговото апсење за убиството на 78-годишната М.С. од село Драгоманце, која ја нападнал во нејзиниот дом и ја задушил со перница. Полициското досие на осомничениот открива дека тој и претходно им бил познат на органите на редот по извршени тешки кражби од деловни објекти и приватни имоти. Од Центарот за социјални работи Куманово информираа дека лицето не било корисник на ниту едно социјално право.
