Османи вели дека нема приватно возило, но дали тоа значи дека службеното го користи за приватни и партиски цели?

Министерот за надворешни работи и потпретседател на ДУИ, Бујар Османи денеска во емисија на ТВ21 зборувајќи за опожареното возило на првиот вицепремиер Артан Груби, откри дека нема приватно возило кое го користи.

По оваа изјава се отвора прашањето дали министерот го користи службениот автомобил, купен од граѓаните, за свои приватни и партиски цели?

Во септември 2021 година по иницијатива од тогашниот вицепремиер за антикорупција, Љупчо Николовски, беше донесена одлука со која се дефинира и регулира користењето на службените возила со цел да се спречи нивна злоупотреба.

„Одлуката е направена така што ги елиминира потенцијалните злоупотреби на службените возила, односно користењето на јавните ресурси за приватни цели. Новиот систем за следење на користењето на службените возила и начинот на кој ќе се обезбедуваат дозволите за користење, овозможува лесно детектирање на неправилностите и нивна санкција“, информираа тогаш од кабинетот на Николовски.

Според одлуката, тоа значеше дека секоја употреба на службено возила ќе мора да е одобрена и наменска.

„Со новите одредби, секое користење на службените возила мора да е одобрено, оправдано, наменско и рационално и во сообразност со визијата, мисијата, целите и делокругот на работата на државниот орган“, беше ставот на Николовски.