Османи со критики до Мицкоски: Наместо визија за ЕУ, создава поделби и поставува услови на Унијата
Поранешниот министер за надворешни работи, Бујар Османи, жестоко го нападна премиерот Христијан Мицкоски, обвинувајќи го дека со популизам и без визија го загрозува европскиот пат на државата. Во објава на Фејсбук, Османи го обвинува премиерот дека, наместо да ја преземе одговорноста за застојот во евроинтеграциите, посочува „виновници“ за да ги прикрие сопствените неуспеси.
„Прво преку изборен популизам ја ограничи можноста дипломатијата суштински да се ангажира и да обезбеди напредок во преговорите со ЕУ. Потоа, целата држава ја стави во заложништво на сопствени ветувања, кои и ден-денес никој не може да ги објасни“, пишува Османи.
Според него, Мицкоски, наместо да ги исполнува условите на Унијата, ѝ поставува услови на ЕУ, што претставува, како што вели, „длабоко нарушување на европското досие на државата“.
Османи тврди дека премиерот не само што нема план, туку никогаш и немал визија за одмрзнување на процесот со Брисел. Наместо тоа, фокусот го префрла кон алтернативни партнерства, далеку од европската перспектива.
„Тоа не е лидерство. Тоа е бегање од одговорност“, додава Османи.
Тој потсетува дека претходната влада, како институционална структура, му оставила на Мицкоски „одличен маневарски простор“, со преговарачка рамка која го признава македонскиот јазик, ја афирмира мултиетничката демократија и бара уставни измени кои, според Османи, веќе се дел од системот.
„Мицкоски има едноставен излез, но самиот се заглави во ќорсокак. Нема план Б. Потребна е одговорност и храброст за реализација на планот А – европската интеграција. А за тоа, потребно е вистинско лидерство“, завршува Османи.
