„ОРКА ХОЛДИНГ“ НУДИ НАД ЕДЕН МИЛИОН ЕВРА ЗА „ЖИТО ПОЛОГ“ – одобрена понудата за преземање, еве колку акции се бараат

Орка Холдинг сака
да преземе уште 50 отсто од акциите на мелничко-пекарската компанија „Жито
Полог“ од Тетово, за сума од нешто повеќе од еден милион евра. Таква намера за
преземање на „Жито Полог“ оваа компанија достави до акционерите на компанијата
уште во ноември минатата година, а пред неколку дена за тоа ја доби потребната
дозвола од Комисијата за хартии од вредност.

Како што извести
Комисијата за хартии од вредност, на седницата што се одржала во петокот
минатата недела, КХВ донела решение со кое на друштвото „Орка Холдинг“ АД Скопје му се
издава дозвола за давање понуда за преземање на друштвото „Жито Полог“ АД Тетово. 

„Понудата за преземање се
однесува на 27.596 обични акции со право на глас издадени од Жито Полог.
Преземањето на хартиите од вредност ќе се врши по цена од 2.266 
денари по акција.Согласно Понудата за преземање, преземачот не утврдил
најмала количина на обични акции на кои се однесува понудата за преземање која
треба да биде прифатена за понудата за преземање да се смета за успешна“, се
вели во соопштението од Комисијата за хартии од вредност кое е објавено на
нивната веб страница.

Доколку се има
предвид дека понудата за преземање се однесува на 27.596 акции, и доколку за
нив се нуди цена од 2.266 денари за акција, тоа значи дека компанијата „Орка
Холдинг“ нуди да плати 62,5 милиони денари или 1,02 милиони евра за купување на
овие акции.

Со оглед на тоа
што акционерското друштво „Жито Полог“ има издадено вкупно 55.997 акции, а
понудата за преземање се однесува на 27.596 акции, тоа значи дека „Орка
Холдинг“ нуди да купи близу 50 отсто од акциите, или конкретно 49,3 проценти.

А, според
состојбата од Централниот депозитар за хартии од вредност, „Орка Холдинг“ и во
моментов е најголем поединечен акционер на мелничко пекарската индустрија,
бидејќи и сега во „Жито Полог“ поседува близу 25 отсто од акциите на
компанијата, или конкретно 24,98 проценти.

Така што, доколку
сите акционери до кои е доставена понудата, ја прифатат, во тој случај „Орка
Холдинг“ би поседувала околу 75 отсто од акциите на тетовската компанија.

Инаку, интересно
е да се објави дека минатата година на редовниот пазар имало едно тргување со
акциите на „Жито полог“, во јуни, и тогаш биле продадени 1.189 акции, по истата
цена која се нуди сега во понудата за преземање, односно 2.266 денари по
акција.

А, според
податоците од ЦДХВ, покрај Орка Холдинг, други акционери во компанијата се
самите „Жито Полог“,
кои поседуваат сопствени
акции од 20,6 проценти, потоа Тони Јосифовски, кој распполага со 19,86 проценти од капиталот на мелничко пекарскиот
комбинат, друштвото за реклами и маркетинг Лид Комуникејшнс има 12,51 отсто,
додека пак акционерот Ненад Јосифовиќ има во свој посед 12,47 отсто од капиталот.И, најмал акционер со
над 5,13 отсто е градежната компанија Софија Градба. 

Основна дејност во “Жито Полог” АД – Тетово опфаќа
производство на мелнички и пекарски производи, тестенини и јајца. Поседува
сместувачки капацитети за житни култури, има сопствена малопродажна мрежа и
специјализиран погон за добиточна храна за задоволување на потребите на
сопствената живинарска фарма.

Н.Н.Ф.