Ѓорѓиевски: Нема вработувања во Град Скопје – нема да дозволам ниту еден денар од буџетот на скопјани да биде злоупотребен!
Градоначалникот на Град Скопје, Орце Ѓорѓиевски, соопшти дека нема да дозволи нови вработувања во градската администрација, нагласувајќи дека ниту еден денар од буџетот на скопјани не смее да биде злоупотребен.
Тој информираше дека денес јавно побарал од сите советници да гласаат против одлуката донесена во минатото за вработување на 21 лице, која, како што посочи, директно би го чинела градот околу 1,4 милиони евра.
Според Ѓорѓиевски, станува збор за средства на граѓаните кои, наместо за вработувања, можат да се искористат за изградба на кружни текови, набавка на нови автобуси и реализација на проекти што носат конкретна корист за Скопје.
„На градскиот буџет гледам како на сопствениот“, истакна градоначалникот, потсетувајќи дека кога ја презеле управата со градот, Скопје се наоѓало во финансиски колапс, но со одговорно и домаќинско работење состојбата била стабилизирана.
Тој порача дека партиските интереси немаат место во Град Скопје и дека приоритет останува борбата за функционален, чесен град кој е во служба на граѓаните.
