Ѓорѓиевски: ЕБОР го откочи БРТ, следува набавка на дополнителни автобуси
Проектот за брз автобуски превоз (БРТ) во Скопје повторно е ставен во функција, што отвора можност за проширување на плановите за набавка на нови автобуси за јавниот превоз. Ова денеска го соопшти скопскиот градоначалник Орце Ѓорѓиевски на седницата за советнички прашања во Советот на Град Скопје.
Одговарајќи на прашања поврзани со состојбите во јавниот транспорт, Ѓорѓиевски информираше дека од кредиторот Европска банка за обнова и развој (ЕБОР) пристигнало официјално писмо со кое се откочува проектот за БРТ системот.
„Сакам ексклузивно за јавноста да споделам дека утринава добивме писмо од ЕБОР, со кое конечно се деблокира проектот за БРТ. Нашата обврска сега е формирање проектна единица и измена на планот за јавни набавки. Покрај 100 автобуси за главниот град, преку БРТ ќе бидат обезбедени дополнителни 30. Наместо ветените 80, Скопје ќе добие вкупно 130 нови автобуси“, изјави Ѓорѓиевски.
Тој посочи дека, по разговорите со премиерот Христијан Мицкоски, се очекува најголемиот дел од планираните 100 автобуси да бидат испорачани во текот на оваа година.
„Не можам да гарантирам дека сите 100 автобуси ќе пристигнат годинава, бидејќи тоа не зависи директно од нас, но можам да потврдам дека Град Скопје ќе започне паралелен процес и за БРТ и за набавката на автобусите“, додаде градоначалникот.
Ѓорѓиевски информираше и дека ЕБОР ги продолжил роковите за реализација на БРТ системот до март.
