Општина Битола ќе даде по 10.000 денари на семејствата на осудените за 27 април – СДСМ прашува: За ова ли се задолжувањата на општините?

Советот на општина Битола донесе одлука семејствата на осудените за упадот во Собранието на 27 април да добијат еднократна финансиска помош од 10 илјади денари.

Одлуката помина со мнозинство гласови од советниците на ВМРО-ДПМНЕ кои не ја појаснија иницијативата на говорница, додека пак советниците од СДСМ и од независната група Поинаку не присуствуваа на седницата на советот.

Од СДСМ преку соопштение велат дека се прави злоупотреба на пари во општинината за осудени од 27 април и партиски членови.

„27 април е најцрниот датум во современата македонска историја, настан во реализација на ВМРО-ДПМНЕ, настан за кој низ судска, отворена постапка се изречени ефективни затворски казни за виновниците.

Одлуката на ВМРО-ДПМНЕ во Советот на општина Битола да им се додели финансиска помош на партиски членови и роднини на осудените лица за 27 април е злоупотреба на пари на граѓаните на општина Битола.

Во ВМРО-ДПМНЕ ништо не е сменето.

Тоа е истата режимска, насилничка партија, која овој пат заедно со Левица троши народни, општински пари за финансиски да поддржува лица осудени за терористичко загрозување на уставниот поредок, лица кои се обидоа да убиваат пратеници, новинари и вработени во Собранието.

Додека ги покачува цените на услугите за граѓаните, ВМРО-ДПМНЕ парите од општинската каса ги дели на партиски членови.

За ова ли се задолжувањата на општините кои по налог на шпицниот Мицкоски го спроведуваат градоначалниците на ВМРО-ДПМНЕ?“, додаваат од СДСМ.