Опремете се со трпение: Утре прекин на сообраќајот во Тетово и Куманово, ќе се тестираат камерите
Министерството за внатрешни работи (МВР) ги информира граѓаните дека утре, недела (25.01.2026), во рамки на проектот „Безбеден град“, ќе се спроведат клучни активности за тестирање и калибрација на системот за сообраќаен надзор.
Активностите ќе се одвиваат на подрачјето на градовите Куманово и Тетово, каде што веќе се поставени нови уреди (камери) за контрола на сообраќајот.
Од СВР Тетово и МВР појаснуваат дека веднаш по завршување на техничката верификација на конкретната точка, сообраќајот ќе продолжи да се одвива нормално.
Полицијата упати апел до сите учесници во сообраќајот да ги почитуваат насоките на полициските службеници и привремените ограничувања.
„Ги повикуваме граѓаните да покажат разбирање, трпение и соработка, со цел непречено и безбедно реализирање на планираните активности“, соопштуваат од МВР.
Проектот „Безбеден град“ има за цел зголемување на безбедноста на патиштата преку автоматизиран надзор и санкционирање на сообраќајните прекршоци.
