ОПЕК плус го одложи зголемувањето на производството на нафта планирано за октомври
Членовите на Организацијата за извоз на нафта – ОПЕК плус ги одложија плановите за зголемување на производството на нафта за планирани 180.000 барели дневно во октомври, што е дел од програмата за постепено враќање на 2,2 милиони барели дневно на пазарот во наредните месеци.
Зголемувањето е одложено за два месеци, изјавија два извори од ОПЕК плус, кои побараа анонимност поради чувствителноста на преговорите, објави Си-Ен-Ен. Фјучерсите на нафтата, кои ослабеа на почетокот на неделата, денеска пораснаа, а нафтата од типот „брент“ попладнево по лондонско време чинеше 73,63 долари за барел, што е за еден отсто повисоко од претходното порамнување.
Намалувањето од 2,2 милиони барели дневно, кое беше спроведено во вториот и третиот квартал, требаше да истече на крајот на овој месец.
Тоа намалување доброволно го поддржаа членките на коалицијата ОПЕК плус: Алжир, Ирак, Казахстан, Кувајт, Оман, Русија, Саудиска Арабија и Обединетите Арапски Емирати, пренесува „Политика.рс“.
Фото: Принтскрин/Твитер
