One Macedonia доби национална лиценца и официјално станува трет мобилен оператор во Македонија
One Macedonia, подружница на унгарската 4iG Групација, официјално ја доби националната лиценца за работа како трет мобилен оператор во Македонија. Лиценцата денеска свечено беше врачена на церемонија организирана од Агенцијата за електронски комуникации (АЕК), што го означува почетокот на долгорочна стратешка инвестиција во развојот на дигиталниот екосистем на земјата.
На церемонијата присуствуваа претставници на АЕК, менаџментот на One Macedonia и претставници на националните медиуми. Овој чекор следува по успешно завршената постапка за доделување на радиофреквенцискиот спектар.
Пал Заранди, претседател на одборот на директори на One Macedonia и директор за мобилна стратегија во 4iG Групацијата, истакна дека влезот на компанијата на македонскиот пазар е дел од стратегиско проширување на присуството на 4iG низ Западен Балкан и дека Македонија ќе биде клучен регионален јазол во дигиталната инфраструктура, вклучително и во проекти како подморскиот кабел Албанија-Египет и „Балкански столб“. Тој додаде дека земјата, како членка на НАТО, има економска и геополитичка релевантност за развој на критични технологии и безбедна инфраструктура.
– „Нашата цел не е само да се натпреваруваме на пазарот, туку да создадеме доверлив дигитален столб во Македонија. Без наследена инфраструктура, можеме да поставиме нови стандарди за ефикасност, брзина и безбедност“, изјави Брано Ѓуровиќ, извршен директор на One Macedonia.
Компанијата најави инвестиции до 100 милиони евра во развој на мрежата, инфраструктура, отворање нови работни места и обуки, како и долгорочна соработка со домашни ИКТ-компании. Со почетната инвестиција од над 8 милиони евра за лиценцата, One Macedonia ја потврдува својата посветеност на долгорочен развој и усогласеност со регулаторните и безбедносните стандарди на ЕУ.
Директорот на АЕК, Јетон Акику, нагласи дека лиценцата е клучен момент за развојот на телекомуникацискиот пазар во земјата, отворајќи ја конкуренцијата и овозможувајќи подобри услуги и побезбедна инфраструктура за граѓаните.
One Macedonia ќе започне со лансирање на мобилна 5G мрежа (Standalone), базирана на европски стандарди и со доверливи добавувачи, како што е Ericsson. Компанијата е целосна сопственост на 4iG Групацијата, која веќе управува со ONE Montenegro и ONE Albania, опслужувајќи повеќе од 2,6 милиони корисници во регионот.
Церемонијата заврши со заедничко истакнување на важноста од конкурентен и одржлив развој на телекомуникацискиот сектор во земјата.
