ОМИЛЕНИОТ СИНЏИР НА РЕСТОРАНИ ЗА БРЗА ХРАНА ВО ГОЛЕМИ ПРОБЛЕМИ: Првите три месеци од годинава има голем пад на продажбата

Продажбата на ланецот ресторани за брза храна „Мекдоналдс“
во САД во првите три месеци од годинава се намали, што е втор квартал по ред со
пад на продажбата.

Овој пад во Соединетите Американски Држави, на најголемиот
пазар на кој ланецот работи, изнесуваше 3,6 проценти, што е најголемо
намалување од 2020 година, односно од пандемијата со коронавирусот кога се
применуваше „локдаун“ (целосно затворање). Нето приходот на оваа компанија во
првиот квартал од 2025 година изнесувал 1,87 милијарди долари, додека во истиот
период минатата година изнесувал 1,93 милијарди долари.

Од „Мекдоналдс“ тврдат дека 2024 година била престапна
година со еден ден повеќе за остварување приходи, што придонело за разликата во
продажбата и оваа година. Главниот извршен директор на овој ланец ресторани за
брза храна, Крис Кемпчински, изјави дека потрошувачите се борат со
неизвесноста, но дека останува оптимист за способноста на компанијата да
функционира дури и во најтешки пазарни услови.

Во разговорите со аналитичари тој посочи дека геополитичките
тензии предизвикале економска неизвесност и, како што констатирал, го намалиле
расположението на потрошувачите повеќе отколку што очекувале. Американскиот
пазар е едно од нивните најголеми пазари каде што е забележан пад на
продажбата.

Тие забележале дека во првиот квартал од годинава бројот на
потрошувачи со ниски приходи се намалил за двоцифрен процент, во споредба со
истиот период лани. Покрај тоа, со двоцифрен процент е намален и бројот на
потрошувачи со просечни приходи, во споредба со пред неколку месеци, пренесува
CNN.