Ѓоковиќ повторно е број 1 во светот! – го совлада Циципас за рекордна 22. Грен слем титула
Новак Ѓоковиќ по десетти пат во кариерата го освои Австралија опен.
Српскиот тенисер го победи Стефанос Циципас со 6:3, 7:6 (4), 7:6 (5) и со тоа го израмни рекордот на Рафаел Надал од 22 победи на Грен слем турнирите.
Ѓоковиќ со оваа победа обезбеди враќање на првото место на АТП ранг листата.
Циципас без шанса во првиот сет, драма во вториот и третиот
Ѓоковиќ одигра многу убедлив прв сет и го одзеде сервисот на Циципас веќе во четвртиот гем. Во исто време, Гркот не се ни приближуваше да се закани дека ќе му го одземе сервисот на Ѓоковиќ. Во вториот сет Циципас го подигна нивото на игра и дури имаше сет-топка на сервис на Ѓоковиќ, но не ја искористи.
Во текот на таа игра Ѓоковиќ беше многу изнервиран од навивачите на противникот, а му се развика и на Горан Иванишевиќ. Во тај-брејкот од вториот сет, пак, Циципас не ја задржа концентрацијата, а српскиот тенисер ги искористи многубројните грешки и отиде на 2:0.
Циципас на почетокот на третиот сет го одзеде сервисот на Ѓоковиќ за прв и единствен пат на мечот, но тој веднаш му возврати. И двајцата потоа безбедно сервираат до тај-брејкот, каде Ѓоковиќ повторно беше убедлив и на тој начин стигна до заслужена победа.
