Ѓоковиќ: Не се каам за двата пропуштени турнири во САД
Сè уште храбро и цврсто стои зад своите ставови и одлуки. Новак Ѓоковиќ не жали што ги пропуштил двата Мастерса во Америка – Индијан Велс и Мајами затоа што решил да не се вакцинира против корона вирусот.
Иако ги доставил документите за виза, барањето му било одбиено, па не можел да влезе во САД и да учествува на првиот Мастер годинава. Затоа не можеше да ја одбрани првата позиција на АТП листата, која му ја одзеде Карлос Алкараз со освојувањето на трофејот во калифорниската пустина.
– Не, не се каам – изјави Ѓоковиќ во ексклузивно интервју за новинарката на Си-Ен-Ен, Беки Андерсон.
– Во животот научив дека жалењето само те кочи и во основа те тера да живееш во минатото, а јас не сакам да го правам тоа.. Сакам да бидам фокусиран на сегашниот момент, но секако размислувам за иднината, создавајќи подобра иднина. Затоа му честитам на Алкараз. Апсолутно заслужува да се врати на првото место.
Не жали што ги пропушти, но жали што не можеше да игра на Мастерсот.
– Штета што не можев да играм во Индијан Велс во Мајами. Ги обожавам тие турнири. Имав многу успеси таму, но во исто време, донесов свесно таква одлука и знаев дека секогаш постои можност да не одам, и се надевам дека тоа ќе се промени за УС Опен. За мене тоа е најважниот турнир на американско тло.
Ѓоковиќ по којзнае кој пат истакна дека во оваа фаза од неговата кариера најважни се Грен слем турнирите и затоа се надева дека барем ќе игра во Њујорк.
– Многу сакам да играм на УС Опен. Имам многу убави спомени. Иако го загубив финалето од Медведев во 2021 година, добив многу љубов и почит од луѓето, па сакам да се вратам таму. Имав еден од најдобрите моменти со публиката во Њујорк. Три пати славев во Њујорк. Се надевам дека ќе играм таму.
Следна станица за Ѓоковиќ е Монте Карло, првиот Мастерс на земјена подлога. Подготовката на Новак за сезоната на црвената земја започнува со турнирот во Монако.
