Околу 11.000 административци ќе земат покачување на платите од скоро 40% до 2028 година
Премиерот Христијан Мицкоски денеска соопшти дека е постигнат договор со репрезентативните синдикати, според кој околу 11.000 вработени во администрацијата, судовите и обвинителствата ќе добијат покачување на платите од речиси 40% до 2028 година.
„Ова е еден поширок пакет каде ќе бидат опфатени заедно со вработените во судовите и обвинителствата некаде околу 11.000 вработени и со ова целосно, Владата како најголем работодавач, практично со своите колеги воспоставува договор и тој договор е со рок на траење до 2028 година. Претходно имаме вакви договори и со вработените во образованието и со вработените во здравството и во останатите институции, така што кога сето ова ќе се заокружи, ние како Влада, како најголем работодавач, практично ги имаме регулирано нашите односи со нашите колеги во рамките на институциите. Ова е историски момент, бидејќи досега никогаш порано не се случило да имаме ваков план за зголемување на платите и нивно усогласување за да дојдеме до некое достоинствено ниво“, изјави Мицкоски.
Премиерот истакна дека овие чекори се дел од одговорното и домаќинско работење со државната каса, дури и во услови на светски и домашни економски предизвици. „Постигнатиот договор понатаму треба да се операционализира преку индивидуални договори, а истовремено очекуваме заедно со двата репрезентативни синдикати да седнеме и да испреговараме нов општ колективен договор, кој ќе биде единствена алатка за исплата на платите“, додаде Мицкоски.
Тој нагласи дека договорот е резултат на конструктивен дијалог и дека се гради доверба меѓу Владата и синдикатите, со цел обете страни, но пред сè граѓаните и државата, да имаат корист од постигнатото решение.
