ОКОЛУ 1.400 ПРИЈАВИ ЗА ДВА ДЕНА ЗА МЕРКАТА ЗА САМОВРАБОТУВАЊЕ – голем интерес за Оперативниот план
На информативен ден за мерките од Оперативниот план за вработување што денеска се одржа во Струмица, заменик-министерот за економија и труд Марјан Ристески ги повика сите заинтересирани да аплицираат на некој од трите објавени јавни повици од мерката Поддршка за самовработување (претприемништво), со која се нуди висока финансиска поддршка, а во годинашните мерки посебен акцент е ставена на поддршката на младите лица.
– Со историски висок буџет за Оперативниот план, кој е зголемен за 7,5 милиони евра и годинава е во вредност од преку 40 милиони евра, како никогаш досега Владата дава поддршка за младите да започнат бизнис или преку практикантство и обуки да се стекнат со разни вештини со што би се зголемила нивната вработливост и тие би биле поконкурентни на пазарот на труд.
Наша цел е да ги задржиме младите во Македонија, имаат пријател и партнер во Владата која ги поддржува, а најдобар доказ за тоа е овој Оперативен план, каде покрај бројните нови мерки наменети само за нив, во сите останати мерки е предвидено најмалку 40 отсто од средствата да бидат наменети за младите лица – истакнал Ристески.
Како што соопшти Министерството за економија, Весна Пешова, заменик-директор на Агенцијата за вработување, пред присутните говорела за постапките поврзани со аплицирањето за користење на некоја од мерките на Оперативниот план и ги повикала сите заинтересирани да аплицираат во некој од 30-те центри за вработување низ државата.
– Таа информира дека интересот за мерката самовработување (претприемништво) е голем и во првите два дена од објавата на огласите досега се доставени околу 1.400 пријави – се наведува во соопштението.
Директорот за поддршка на претприемаштвото, Даниела Димовска, се осврнала за поддршката која ќе им биде дадена на сите лица кои ќе добијат средства од мерките, како што се стручното советување во креирањето на бизнис-план, како и обуките за претприемништво и менторството.
Министерството за економија информира дека јавните повици траат до 20 јуни, а во наредниот период ќе се објават јавни повици и за другите мерки од Оперативниот план.
