Охридското езеро по три години дадено под концесија, струшка фирма плати 400.000 евра
Струшката фирма Еко-свет вчера по пат на јавно надавање го доби Охридското езеро под концесија за стопански риболов во период од шест години. Сумата која ќе биде платена изнесува 400.000 евра, дознава Алсат.
„Постапката за доделување концесија на риби за вршење стопански риболов и организирање рекреативен риболов на Охридското Езеро е во тек. Обврските по однос на порибувањето, количини и улов на риба на идниот концесионер ќе бидат утврдени во договорот за концесијата по изборот на концесионер“, рекле од Министерството за земјоделство.
Охридското езеро нема концесионер од јануари 2020 година, кога на фирмата која ја вршеше оваа дејност, „Летница-Белвица“ државата ѝ ја одзеде концесијата, зашто не водела точна евиденција за уловената риба.
Истовремено продолжува незадоволството кај спортските риболовци и еколошките здруѓенија, кои тврдат дека на концесионерите секогаш приоритет им е профитот, наместо грижата за езерото.
