ОГАН И ПЛАМЕН: Во „Белград на вода“ квадрат чини над 10.000 евра

Екстремно скапи се недвижнините во Белград, посебно ако станува збор за „Белград на вода“. Но, интерес има. 

За купување недвижен имот во Србија во четвртиот квартал од 2022 година се потрошени 2,3 милијарди евра. Тоа е зголемување од 27,3 отсто во однос на истиот квартал лани, соопшти денеска Републичкиот геодетски завод.

Највисоки цени се постигнати за становите во „Белград на вода“, каде што најскапиот квадрат е продаден по цена од 10.184 евра, додека најскапиот стан со вкупна површина од 383 метри квадратни е платен за 2.469.888 евра. 

Градот Белград забележал најголем број купопродажни договори, вкупно 9.547. Најголем дел од парите се потрошени за купување станови, 55 отсто или 1,2 милијарди евра.

Бројот на продадени станови во четвртиот квартал од минатата година е зголемен за 0,6 отсто во однос на истиот период од 2021 година. Девет отсто од целокупниот недвижен имот е платен од кредити. 

Неодамна Белград беше рангиран и како најскап град за живот во регионот.