Одобрена е првата продажба на запленетиот имот на Мијалков и Груевски, се очекуваат почетни 3,5 милиони евра

Нова тура на конфискуван имот на поранешниот шеф на тајната полиција Сашо Мијалков и екс премиерот Никола Груевски оди на продажба со лицитација, откако Владата ја процени неговата вредност и го одобри за огласување. Првиот „продажен циклус“ одобрен на една од последните владини седници треба да донесе најмалку 3,5 милиони евра во државната каса.

Најголема вредност имаат апартманите во „Панорама Резиденс“ на Мијалков, меѓу кои засега одобрена е понудата на три, а при тоа секој од нив вреди безмалку милион евра. Еден апартман од 200 метри квадратни и помошна просторија од 45 метри квадратни на Водно е проценет на стартни 860.000 евра. Одоколу толку е проценет и вториот, додека третиот кој е најмал ќе се продава со почетни 765.000 евра. Само овие три апартмани преку Агенцијата за управување со конфискуван имот на државата би и донеле најмалку 2,5 милиони евра. 

Одобрена е и продажба на осум парцели кај Гевгелија во вкупна почетна вредност од 925.000 евра. Во јавното наддавање ќе има и стан во Охрид од 90 метри квадратни со почетна проценета вредност од 85.000 евра.. 

Ќе се продава и стан од 57 метри квадратни на улица „Бихачка“ со почетна понуда од 63.000 евра, исто така и втор стан на истото место но помал од 38 метри квадратни за 43.000 евра.

Се очекува државата да инкасира најмалку 29 милиони евра од запленетиот имот, пред се од предметот „Империја“, според она што претходно го најавија од Агенцијата за одземен имот. пред неколку месеци.

Ќе се продаваат станови, апартмани, гаражи, деловен простор и градежно земјиште. Овие имоти на братучедите им беа одземени во неколку судски процеси против нив.

Досега, државата од Мијалкови наплати 332.276 евра од продажба на три стана и гаража на Водно. И тоа, фирмата „Бест веј инвестмент“, фирма во сопственост на Јордан Мијалков, сама си ги купи.

Поранешниот шеф на тајната служба во јули 2022 година призна вина и се спогоди за „Империја“. Со спогодбата, Мијалков беше осуден на 3 години затвор и исплати 6,1 милиони евра во кеш за уделот во хотелот Мериот. Одземен му беше и имот во вредност од околу 30 милиони евра. Пред да биде упатен на издржување на казната, тој ја смени адресата на живеење од Скопје во Охрид, што му овозможи да оди во затворот во Струга кој е од отворен тип.

Случајот „Империја“ беше отворен во 2018 од страна на поранешното СЈО за злосторничко здружување, оштетување или повластување на доверители, злоупотреба на службената положба и овластување, измама и перење пари и други приноси од казниво дело. Покрај Орце Камчев и Мијалков како првоосомничени, во истрагата беа опфатени уште 11 други лица.

Груевски во 2018 година, по објавувањето на затворската казна за случајот „Тенк“, за спорна набавка на службено возило мерцедес побегна во Унгарија каде што доби азил. Македонските власти по него имаат распишано меѓународна потерница.

А.К.