Одложено судењето на Штекли: Доживеал епилептичен напад и паднал во судница!
Судењето за случајот „Штекли“, во кој повеќе лица се обвинети за организирана продажба на дрога, е одложено за 9 октомври на барање на одбраната на првообвинетиот Раде Трајковски – Штекли.
Пред почетокот на денешното рочиште, Трајковски доживеал епилептичен напад и паднал во судницата. По интервенција на лекарска екипа од Брза помош, тој одбил да прими терапија, поради што судот му овозможи да го следи процесот од посебна просторија.
Адвокатот Сашко Дуковски реагираше дека нападот не може да се третира како нарушување на редот, бидејќи обвинетиот е лице со констатирана епилепсија и претходно му била препишана психијатриска терапија. Тој нагласи дека одбраната нема интерес да го одолговлекува процесот.
Судијата Илија Трпков истакна дека судењето мора да се води ефикасно, но и со почитување на правата и здравствената состојба на обвинетите, додавајќи дека евентуални обиди за одолговлекување ќе бидат санкционирани.
Обвинението на Обвинителството за организиран криминал опфаќа 10 лица, а дел од првично осомничените веќе склучиле спогодби и добиле затворски казни. Според обвинителството, групата имала јасна организација во набавка и продажба на кокаин и марихуана, а клучни докази биле обезбедени преку анализа на мобилни телефони со системот „Cellebrite“.
