ОДЛОЖЕНО Е ДЕНЕШНОТО РОЧИШТЕ ЗА ОТВОРАЊЕ СТЕЧАЈ ВРЗ „БЕТОН“ – целта е да се исплатат заостанатите плати
Денешното рочиште за отворање стечај врз градежната компанија „Бетон“ е одложено, бидејќи тоа го барал привремениот стечаен управник на компанијата.
За ова информиира Сојузот на синдикатите на Македонија, од каде велат дека одложувањето е со цел да се исплатат заостанатите плати.
Оттаму велат дека работниците до крај ќе ја тераат постапката за отворање стечај, како би ги добиле своите шест заостанати плати.
„Денешното рочиште по Предлогот за отворање на стечајна постапка односно за престанок на работодавачот поднесен од страна на Синдикатот за градежништо, индустрија и проектирање, односно во име на вработените од ДГ Бетон АД Скопје до Основниот граѓански суд Скопје, е одложено, по барање на привремениот стечаен управник, за да се исплатат заостанатите плати на вработените за кои е покрената постапката со Предлогот за отворање на стечајна постапка односно за престанок на работодавачот. Рочиштето е одложено за 17 март оваа година.
Работодавачот ДГ Бетон АД Скопје веќе шести месец нема исплатено плата, а сметката на компанијата е затворена односно боликирана повеќе од 45 дена, што е доволен основ за отварање на стечај на работодавачот и материјално обезбедување на работниците“, се вели во соопштението од Синдикатот.
Оттаму нагласуваат дека работниците се одлучни да ја водат постапката до крај за да ги добијат нивните плати, а доколку е потребно и доколку или судот или привремениот стечаен управник се обидат да ги изиграат, друга група на вработени бара да се поведе и нова постапка и за овие шест месеци неисплатена плата кон нив, а за што се спремни да поднесат и нов Предлог за отворање на стечајна постапка односно за престанок на работодавачот.
„Синдикатот за градежништо, индустрија и проектирање на Република Македонија и Сојузот на синдикатите на Македонија целосно стојат позади вработените за истите да ги остварат нивните работнички правата и на овој начин. Со постапката која е веќе започната, работодавачот е принуден и веќе започна да исплаќа дел од заостанатите плати. Ги охрабруваме работниците да го контактираат Синдикатот за сите заедно, а не поединечно да ги остварат нивните работнички права“, нагласуваат од ССМ во своето соопштение.
