Одадена почит на единаесетте загинати припадници на Армијата во хеликоптерската несреќа кај катлановско Блаце
Со полагање на свежо цвеќе на местото на хеликоптерската несреќа кај катлановско Блаце, во касарната „Страшо Пинџур“ во Петровец и во кампот Бутмир во Сараево се одаде почит на единаесетте армиски припадници од составот на воздухопловниот Винг кои пред шеснаесет години трагично ги загубија своите животи.
На спомен обележјето, во помен на загинатите припадници со венци свежо цвеќе положија делегации од Генералштабот и Министерството за одбрана, Командата за операции, воздухопловниот ВИНГ, првата пешадиска бригада, членовите на семејствата на загинатите и претставници на општината Петровец.
Почит на загинатите е одадена и пред спомен обележјето пред командата на воздухопловниот Винг во касарната „Страшо Пинџур“ во Петровец, како и во кампот Бутмир во Сараево, Босна и Херцеговина.
Армискиот хеликоптер Ми-17 се урна на 12-ти јануари 2008 година кај катлановско Блаце, враќајќи ги од мисија мисијата „АЛТЕА“ потполковник Тони Спасовски, мајор Горан Ристовски, капетаните Бране Спасовски и Игор Ѓорески, наредниците Славчо Василев и Тони Давитковски, постарите водници Јанко Шириќ, Александар Тасковски, водниците Мики Ивановски и Александар Васиќ и десетарот Златко Вељановски.
