Од паровите во Богота се бара заедно да се тушираат поради сушата што ја зафати Колумбија
Градоначалникот на Богота апелираше до паровите да се тушираат заедно поради недостигот на вода предизвикан од сушата во главниот град на Колумбија.
Некои од најголемите населени места се отсечени од водоводната мрежа за да се зачува опасно ниското ниво на вода во акумулации кои останаа без дождовница поради временскиот феномен познат како Ел Нињо.
„Туширајте се со парен туш. Ова е едукативна вежба за заштеда на вода, ништо друго. Ваквите работи многу ќе ни помогнат. Тие промени во однесувањето се клучни“, изјави градоначалникот на Богота, Карлос Фернандо Галан, пренесува Гардијан.
Галан, исто така, побара од жителите да размислат за целосно напуштање на секојдневните хигиенски навики, имајќи предвид дека акумулациите се на „историско ниско ниво“.
„Ако нема да ја напуштите куќата во недела, или во кој било друг ден од неделата, искористете го тоа и не се капете“, се изјасни тој пред ограничувањата.
Ел Нињо, кој обично предизвикува помалку врнежи во Јужна Америка, предизвика рекордни суши и температури оваа година, принудувајќи ги локалните власти ширум регионот да преземат итни мерки.
Сместен на Андите на 2.600 метри надморска височина, Богота обично е поштеден од најлошото сценарио. Оваа многу дождлива престолнина добива во просек 1.020 mm врнежи секоја година, речиси двојно повеќе од озлогласено мрачниот Лондон.
Меѓутоа, овој пат, ненормално долгите топли и сушни периоди предизвикаа шумски пожари низ главниот град, покривајќи некои населби со чад. Сега акумулациите, на кои се потпираат околу 10 милиони луѓе во поширокото градско подрачје, се на „критично“ ниво.
