Од Крива Паланка до Куманово за 40 минути

Со новиот експресен пат од Страцин до Крива Паланка ќе се патува 10 минути. Од Крива Паланка до Куманово пак наместо еден час, ќе се стигнува за 40 минути. Патот е во должина од 25 километри, и е дел од Коридорот 8. Изградбата почна во 2018-та, а интензивно се работеше последниве шест месеци. Надлежните задоволни од реализираното. Најавуваат проектирање на нов експресен пат од Куманово до Страцин. Делницата би требало да овозможи економски развој, но и побрз и безбеден сообраќај.

„Овој пат сигурно ќе го забрза протокот помеѓу главниот град Скопје и истокот на Македонија. Ќе претставува витална артерија за поврзување со Бугарија и секако очекувам да ја развие економијата од левата и десната страна на овој нов експресен пат да се развиваат нови индустриски капацитети, да се отвораат нови фабрики“, рече министерот за транспорт и врски, Александар Николоски.

„Овој пат е на коридорот 8 и е главна поврзница со Бугарија, Турција и со останатиот дел од Европа. Во соработка со Владата и министерството за транспорт и врски планираме проектирање на нов експресен пат од Куманово до Страцин ќе почнеме и со планирање на клучка кај Гиновци“, нагласи директорот на ЈПДП, Коце Трајановски.

Премиерот Мицкоски побара капиталните проекти да не се користат за политички поени. Најави дека со иста динамика ќе продолжат градежните работи и на другите патишта низ земјава.

„Набргу од денеска ќе присуствуваме на пуштање на уште една делница дел од Коридор 10 Д, потоа првата делница од пругата која исто така со децении е ветувана, се забрза и изградбата на автопатски делници од коридор 8 и 10 од Гостивар до Букојчани, од Кичево до Охрид од Прилеп до Битола“, нагласи премиерот Мицкоски.

На експресниот пат има изградено три клучки и ист толкав број мостови.

Изградбата на експресниот пат Страцин-Крива Паланка чини 102 милиони евра од кои најголем дел се обезбедени како заем од Светската банка, а помалку 14 милиони евра се од Инвестицискиот фонд како грант.

Извор: МРТ