Од денеска ќе нема чисти чаршафи за болничките кревети на Клинички!
Во клиничкиот центар „Мајка Тереза“ од денеска нема да се обезбедуваат чисти чаршафи за болничките кревети, јавува Канал 5.
Причината е бојкотот на вработените во пералната, кои од декември не примиле плата.
„Од декември немаме земено плата, чекаме секој ден. Денеска протестираме и не примаме чаршафи, само зелени зошто тоа треба за операции и не можеме така да оставиме“, велат вработени од пералната за Канал 5.
Приватната фирма СкопСтер, која управува со пералната од јануари 2024, тврди дека проблемот е поради доцнење на исплатите од Службата за општи и заеднички работи. Од Службата, пак, велат дека средствата се исплатени уште во декември.
Заменик министерот за здравство, Јовица Андовски, најави итно решавање на проблемот.
