Очајниот Интер не победи ни во Салерно – Кандерва со еврогол ги шокира во 90-та (ВИДЕО)

Иако Интер водеше после само шест минути игра откако Робин Госенс даде гол на асистенција на Ромелу Лукако, кој повторно се посрамоти со утка од два метри, „нераѕурите“ не успеаа да ја сочуваат предноста за да излезат од кризниот период, а овој нов шок им доаѓа во уште понезгодно време со разнишаната самодоверба пред првиот четвртфинален меч со Бенфика во Лигата на шампионите.

Кандерва во последната минута од регуларниот дел им даде еврогол „од паркинг“ за Салернитана да освои нов важен бод во битката за опстанок и сега со 29 е веќе на плус десет од првата во опасната зона Верона и многу близу да го задржи статусот на елитен калчолигаш.

Candreva 🫣pic.twitter.com/wdCOzFMDpt

— GonçaloDias17 (@goncalo_diass17) April 7, 2023

Интер, пак, дојде до само 51 бод како четврти, исто толку има и Милан кој вечерва го игра мечот со Емполи во ова коло, но Рома со 50 бода има шанса да ги истурка „нераѕурите“ од позиција за ЛШ, а Аталанта ако победи да се израмни во тесната битка за излез во мултимилионското друштво во следната сезона.