„Обвинувањата се неосновани, откажан е поради слаба продажба“: Хаџиќ го демантира МВР!
Ален Хаџиќ, организаторот на најавениот концерт на австралискиот диџеј Тими Трампет, остро ги демантира обвинувањата дека против него е поднесена кривична пријава за „компјутерска измама“, во врска со овој настан.
Како што наведува во својата јавна реакција, концертот бил навистина планиран да се одржи на 13 јуни 2025 година на стадионот на АРМ во Скопје, со уредно потпишани договори со артистот и соработниците, како и одобрение од Министерството за одбрана за користење на локацијата.
Хаџиќ објаснува дека единствената причина за откажување на настанот била слабата продажба на билети – биле продадени вкупно 83 билети преку 47 трансакции – при што сите купувачи биле уредно информирани и целосно обештетени во рокот наведен во официјалната комуникација.
„Ниту во еден момент не се продавале билети без постоечки договори, ниту имало намера за измама. Обвинувањата се апсолутно неосновани и штетни по нашето достоинство и углед,“ – наведува Хаџиќ.
Тој додава дека компанијата е целосно подготвена за соработка со сите надлежни институции, и по потреба ќе ги обезбеди сите документи поврзани со настанот, како и комуникацијата со купувачите и артистот.
На крајот, Хаџиќ најавува преземање правни чекори за заштита на личниот и професионален интегритет, нагласувајќи дека компанијата со години работи транспарентно во областа на организација на јавни настани.
