Обвинителството тврди: Останала забраната за приближување до жртвата
Не стивнуваат реакциите во јавноста по двојното убиство во Велес. По тврдењата дека судот, на барање на обвинителството, само пет дена пред грозоморното дело му ја укинал забраната на 39-годишниот скопјанец да го напушта домот и да се јавува во полиција, од Јавното обвинителство реагираа дека обвинителот не побарал укинување на сите мерки. Останала мерката за забрана за приближување до оштетените.
На 21 мај годинава, Росица пријавила дека обвинетиот продолжил да ѝ испраќа пораки и фотографии со цел да воспостави контакт. Три дена претходно, тој го одзел и го запалил автомобилот на нејзиниот татко. Издадени биле наредби до МВР за обезбедување докази од телефонската комуникација, како и четири наредби за обезбедување снимки од видеонадзор од различни локации во градот.
Од Обвинителството појаснуваат дека полициските постапки се одвивале и во моментот на извршување на убиството. Доколку била определена мерка притвор со изрекување условна осуда, таа веќе не би била во сила и задолжително би била укината со пресудата од 10 септември.
„И да бил определен притвор, тој не би бил на сила во моментот на извршување на последното дело“, нагласуваат од Јавното обвинителство.
